[Erreportajea] Bakardadea alboratzeko elkar eragina partekatu dute
Jaizkibel konpainiak bidelagun izandako Kattalin Miner, Itziar Ituño, eta Garbiñe Biurrun elkarrizketatu ditu ‘Aurrera egin badugu’ dokumentalean. Borroka ezberdinen arteko eragina islatu dute.
![Garbiñe Biurrunek eta Arantxa Urretabizkaiak ere parte hartu dute ikus-entzunezkoan [Irudia: J.R.Poveda].](https://bidasoa.hitza.eus/site/files/2021/02/urreta.jpg)
Garbiñe Biurrunek eta Arantxa Urretabizkaiak ere parte hartu dute ikus-entzunezkoan [Irudia: J.R.Poveda]. 
Jaizkibel konpainiaren ibilbideak milaka herritarren bizitzetan eragin du, ez soilik Hondarribian eta Behe Bidasoa eskualdean, Euskal Herrian baizik. Hondarribiko jaietako konpainia parekide bakarrak aurrera urratsak egin ahala, kontzientziak piztu eta gizartearen iritzi aldaketa bultzatu du, poliki, mantso. Aurrera emandako pausoak arinak izan ez diren arren, ez dira noraezean eman, eraldaketarantz baizik. Eta bide hori, maiz, bakardadean egiten dutela sentitu dute bultzatzaileek.
Errealitatea oso bestelakoa dela islatu dute konpainia parekideko kideek, hala ere, Aurrera egin badugu dokumentalean. «Jaizkibelek inguruan dituen bestelako aliatu eta lagun feministei entzun nahi izan die gure bidea, beste askok, beste hainbat tokitan, hartu dutenaren paraleloa dela ikusten dugulako», azaldu du Oihana Etxebarrieta Jaizkibel konpainiako kapitainak. Bide horiek «elkar topatzen eta elkar eragiten» dutela iritzi dio: «Tolosan edo Donostian zer gertatu den jakitea, eta esparru profesionalean zer nolako ibilbideak egin dituzten ezagutzea, non gauden baloratzeko baliagarria izan zitekeela iruditu zitzaigun».
Ildo horretan, Jaizkibelgo Jaime Altunak, Arantxa Urretabizkaiak eta Etxebarrietak berak, konpainiak bidelagun izan dituen Kattalin Miner, Garbiñe Biurrun eta Itziar Ituño elkarrizketatu dituzte, hurrenez hurren. «Feminismoan eta borroka feministan haientzako mugarriak zeintzuk izan diren azaldu dute. Jaizkibelek haien bizitza pertsonal, profesional eta militantean nola eragin dien, eta aldi berean, nola eragin diguten jaso nahi izan da solasaldietan», adierazi du Etxebarrietak.
«Horrez gain, Jaizkibeli gertatzen zaiona gizarte patriarkal baten ondorio dela ikusarazi nahi izan dugu», jarraitu du hondarribiarrak, «ez dela zerbait berezia, nahiz eta argi dago bere berezitasunak eta espezifikotasunak dituela, baina bizitza eta borroka luze bat partekatzen du beste askorekin».
Martxoaren 5ean estreinatuko dute ikus-entzunezkoa Itsas Etxean, 19:00etan. Sarrerak agortu dira jada, nahiz eta leihatilan gutxi batzuk banatuko diren. Hendaiako Danborradak iaz jaso beharreko Hondarribia Berdintasun Hiria saria ere banatuko dute
