Asteleheneroko mobilizazioak berreskuratuko ditu Txingudiko Pentsiodunen Mugimenduak
Irun COVID-19aren eremu gorritik atera denez, berriro kaleak aldarriz betetzeko apustua egingo dute. Astelehenean (martxoak 1) manifestazioa egingo dute Irungo kaleetan barrena.
Azken astelehenetan kalera itzuli dira pentsiodunak, San Juan plazara. Irun COVID-19aren eremu gorritik atera denez, Txingudiko Pentsiodunen Mugimenduak asteleheneroko elkarretaratzeei berrekingo die. Hala, datorren astelehenean (martxoak 1) berriro San Juan biltzeko deia egin dute. Oraingo honetan, gainera, manifestazioan abiatuko dira plazatik, erdiguneko kaleak zeharkatzeko. Mobilizazioa San Juan plazan amaituko dute, bertan ekitaldia egingo baitute. Mugimendutik azaldu dutenez, osasun neurri zorrotzak hartuko dituzte.
Dena den, azken asteotan euren kabuz elkarretaratzeko pausoa eman duten pentsiodun ugari izan dira. Mugimenduak deialdiak bertan behera utzi arren, azken astelehenetan hamarka lagun bildu dira udaletxe parean, pentsio duinak exijituz. Esaterako, beheko irudia joan den astelehenekoa da.
