Valle Inclan omenduko du Rafael Alvarez 'El Brujo'-k larunbatean
Emanaldia hasi baino bi ordu lehenago leihatilan eskuratu ahal izango dira sarrerak, Interneten eta Arma Plazan zeudenak agortu direla jakinarazi baitu udalak.
El Brujok ‘El alma de Valle Inclan’ emanaldia eskainiko du larunbatean.
Rafael Alvarez El Brujo aktore eta antzerkigileak El alma de Valle Inclan izenpeko emanaldia eskainiko du larunbatean (hilak 30), Itsas Etxea auditoriumean, 19:00etan. Sarrerak lortzeko interesa duten lagunek leihatilan bertan saiatu beharko direla jakinarazi du Hondarribiko Udalak, larunbatean bertan 17:00etatik aurrera, Arma Plaza informazio gunekoak eta sarekoak agortu baitira dagoeneko.
Andaluzian jaiotako antzezleak hainbat izendapen eta sari irabazi ditu bere ibilbide profesionalean zehar, hala-nola: Espainiako Kultura Ministerioaren Arte Ederretako Merituaren Urrezko Domina, Ikaro saria, Ercilla saria, edota Andaluziako Domina. Hamaika herrialdetako jaialdietan parte hartu du, halaber, aktoreak.
Antzerkian, zineman eta telebistan lan egin du, eta egungo erreferenteetako bat da Espainiako kultura arloan. Sare sozialetan irakur daitekeen bezala, «aktore bezala egin zuen lehen urratsetik 35 urtera, Rafael Alvarezek antzerkia, kultura eta giza espiritualtasuna ulertzeko modu berezia agertokietan erakusten jarraitzen du. Funtzio bakoitzean berritzen den zeremonia magikoa eskainiz».
