Bitartekaritza zerbitzua martxan jartzea galdegin dute EH Bilduk eta Abotsanitzek
Lokaletako jabeen eta maizterren arteko akordioak «errazteko» helburuarekin, Bidasoa Bizirik garapen agentzian aurkeztu dute proposamena.
Irungo EH Bilduko Jokin Melida eta Abotsanitzeko Estitxu Urtizberea Bidasoa Bizirik-eko atarian. 
Bidasoko enpresa txiki eta langile autonomoek COVID-19 gaitzaren ondorioz pairatutako galerak lausotzeko helburuarekin, lokaletako jabeak eta maizterrak laguntzeko bitartekaritza zerbitzua martxan jartzea proposatu dute Bidasoko EH Bilduk eta Abotsanitz Herri Batzarrak. Bidasoa Bizirik garapen agentzian erregistratu dute eskaria.
«Honen helburua litzateke lokalen jabe eta maizterren arteko akordioak lortzea bizi dugun egoera honetan alokairuaren prezioa ez dadin izan negozioen itxiera eragingo dutenak», adierazi dute kideek, «eta Bidasoa Bizirik garapen agentzia lanketa hau egiteko erreminta egokia dela uste dugu». Zerbitzua debalde izan behar duela ere erantsi dute bi ordezkariek.
