Emakumeen giza eskubideez eta desberdintasun ekonomikoaz ariko dira asteartean
Gaurko Andreak Berdintasunaren Aldeko Elkarteak hitzaldi bat antolatu du astearterako. Maria Pazos Moranek eskainiko du.
Iaz elkarteak egindako hitzaldi baten irudia. Urtea behar bezala amaitzeko, hitzaldi berri bat antolatu du Gaurko Andreak Berdintasunaren Aldeko Elkarteak hilaren 15erako (asteartea da). Maria Pazos Moranek Emakumeen giza eskubideak eta desberdintasun ekonomikoa izeneko hitzaldia eskainiko du 18:00etan, azken hitzorduak bezalaxe, modu telematikoan. Zoom aplikazioa baliatuko dute horretarako, eta izen emateak esteka honetan edo helbide honetara idatziz egin beharko dira.
«Giza eskubideen kontzepzio estuak tradizionalki emakumeak baztertu ditu, baita gurekin, emakumeekin, lotutako fenomeno asko ere. Bazterketa horren modu bat mundu osoko abusu eta desberdintasun askoren ikusezintasuna, permisibitatea eta legezkotasuna da. Baina, berdintasun formala lortu dugun herrialdeetan, nagusitasuna, batez ere, emakumeen eta gizonen arteko benetako berdintasuna eragozten duten baldintza materialei eutsiz gauzatzen da», esan dute taldeko emakumeek.
Hizlaria Madrilgo Konplutentsean matematiketan lizentziatutakoa da, eta Harvardeko Unibertsitateko Estatistika Masterra egin zuen. 2004tik politika publikoei eta genero berdintasunaren gaineko ikerketa ugari egin ditu.
