«Herritarrengandik hurbil egoteko lehentasuna duen» programa aurkeztu du gobernu berriak
Udal gobernu berriko PSE-EE eta Elkarrekin Podemos-IUk etapa berriaren ibilbide orria aurkeztu dute gaur. Programa osoa dagoeneko kontsulta daiteke.
Etxebeste eta Santano, gaurko agerraldian. PSE-EE eta Elkarrekin Podemos-IUk adostutako gobernuren ordezkaritza berriak aurkeztu dituzte gaur Jose Antonio Santano alkateak eta Elkarrekin Podemos-IUko bozeramaile Miren Etxebestek. Horrez gain, bi alderdien artean adostutako gobernu programaren berri eman dute gaurkoan, etapa berriaren ibilbide orriaren berri eman dute, «beti malgua eta herritarrengandik hurbil egoteko lehentasuna duena».
Alkateak azaldu duen bezala, «Elkarrekin Podemoseko hiru zinegotziak adostutako ordezkaritzetan sartzeaz gainera, egokitzapenak egin ditugu gobernuaren gainerako erantzukizunetan, Irunerako onena nahi izatea lehentasuna dugun 10 gizon eta emakumez osatutako talde bat osatzeko. Hori da gure konpromisoa, eta, gainera, Gobernu Programa batean islatuta dago».
Gobernu berriaren berrantolaketaren barruan jaso dute Elkarrekin Podemos-IUko hiru zinegotzi gobernu zereginetan sartzea, horietako bat %100ean eta bi %75ean, eta zentzu horretan, talde gisa bozeramailearen soldatari eta taldeko idazkariari uko egitea erabaki dute. Hortaz, Jon Ugarte zinegotzia (PSE-EE) gobernutik ateratzea erabaki dute sozialistek.
Honela geratuko da gobernu talde berria: Jose Antonio Santano alkatea, Miguel Angel Paez sozialista (1. alkateordea, Ekonomia eta Ogasunerako eta Hiri Garapeneko ordezkaria), Elkarrekin Podemos-IUko David Nuño (2. alkateordea eta Gizarte Ongizateko ordezkaria), Cristina Laborda sozialista (3. alkateordea, Obra Publikoetako ordezkaria, Udaltzaingo eta Bizikidetzako ordezkaria eta Giza Baliabideetako eta Zerbitzu Orokorretako ordezkaria), Juncal Eizagirre sozialista (4. alkateordea, Kultura ordezkaria eta Hiri Bultzadako ordezkaria), Elkarrekin Podemos-IUko Miren Etxebeste (5. alkateordea, Berdintasuneko eta Euskara sailetako ordezkaria), Borja Olazabal sozialista (6. alkateordea, Kiroletako ordezkaria eta Garapen Jasangarriko eta Mugikortasuneko ordezkaria), Monica Martinez sozialista (7. alkateordea, Informazioaren Gizarteko, Herritarren Partaidetzako eta Auzoetako eta Bide Publikoko ordezkaria), Rebeca Gonzalez sozialista (8. alkateordea, Etxebizitzako,Balioetako eta Giza Eskubideetako, Kontsumoko eta Hiri diziplinako ordezkaria) eta Elkarrekin Podemos-IUko Santiago Jimenez (Lankidetzako, Memoria Historikoko eta Hezkuntzako eta Gazteriako ordezkaria).
Hiru bloke nagusi
Garapen eraginkorra izango da Gobernu Programaren ibilbide orria. Hala, 2030 Agendaren 17 Garapen Eraginkorreko Helburuak jaso dituzte bertan, «ulertzen baita helburuak globalak diruditen arren ekintzek tokikoak izan behar dutela eta Irunek, 2020-2023 Gobernu berri honetan, ezin duela galdu garapen jasangarriko helburu horien horizontea». Programa honek ondorengo hiru multzo handitan zehaztu ditu ekintzak: Pertsonak, berdintasuna eta gizarte kohesioa, kontzientzia eraginkorra duen garapena eta aukera ekonomikoak eta oparotasuna ziurtatzea.
«Baina jakin badakigu udal egoera erabat aldatu duela 2020ko martxoan COVID-19ak eragindako osasun krisiak, ondorengo alarma egoerak eta kutsatze bolada berrien ondoriozko ezegonkortasunak eta horrek guztiak udal politikak erabat birplanteatzea eskatu duela. Pandemiak gehien eragiten dien pertsonei premiaz eta berehala erantzun behar izateak, programa berriak egiteak eta diru sarrerak murrizteak behartu egiten gaitu malguak izatera, beraz, eta jakin behar dugu dena herritarren beharretara egokitu behar dela eta eraginkortasunez eta eraginkortasunez erantzun behar zaiela irundarren eskaerei», erantsi du alkateak.
Aipatutako hiru bloke horien lehenengoan Irun xede duten ekintzak eta proiektuak bildu dituzte, hala nola, haur parkeak egokitzea, Emakumeen Etxearen proiektua amaitzea, alokairuzko etxebizitzak egitea Alardea, San Miguel Anaka, Lastaola, Lucas de Berroa edo Alberto Larzabalen, hirugarren anbulatorio bat eraikitzea, CBAren bigarren fasea bultzatzea, Katean kiroldegi berria eraikitzea edo San Miguel Anakan aisialdirako eta kirolerako ekipamendu berriak eraikitzea. «Era berean, ahulenekin konpromisoak hartzea, Housing First bezalako programak garatuz, edo euskara zeharkako hizkuntza gisa baldintzarik gabe babestea, eta baita jarraipena egitea Arbeseko egoitza eremuari ere», erantsi du Santanok.
Bigarren blokean «hiri atseginago eta bizigarriagoa» egiteko proiektuak bildu dituzte, bereziki hiri mugikortasunari lotuta. Hiri garraioaren elektrifikazioan aurrerapenak egin nahi dituzte batetik, eta bestetik, oinezkoa mugikortasun politiken «erdigunean» jarri nahi dute. Horretarako, erdiguneko inguruetan jardungo dute, besteak beste, Legia kalean, Foru karrikan eta Berrotaranen, «oinezkoentzako izaera emateko». Gainera, Olaberriako eta Txingudiko plan berezietan aurrera egiteko ekintzak ere jaso dituzte programan.
Azken atalean, «Irun aukerak eta ekonomia dibertsifikatua duen hiri bizi eta dinamiko» bilakatzeko ekintzak jaso dituzte bi taldeek. Gaurko agerraldian nabarmendu dutenez, Via Irun izango da helburu hori garatzeko proiektu nagusia. Proiektu horrek hobekuntza garrantzitsuak ekarriko dituela esan du Santanok, hala bola, Kateako eta Belaskoeneako topo geltokiak hobetzea. Horrez gain, Hego Ingurabideko proiektua amaitzea edo «Ficobaren profil berezi eta bakarra garatzea» ere jaso dute atal honetan. Amaitzeko, Irun Aurrera programarekin konpromiso ugari jaso dituzte.
Proiektuak, gainera, auzo plan bat ere jasotzen duela azaldu dute bi taldeetako kideek, «hiriko 17 auzoetan egiteke dauden ekintzei erantzuteko eta hartutako konpromisoak jasotzeko». Orotara, 39 proposamen jaso dituzte.
Osoko bilkura, urtarrilean
Urtarrilean eztabaidatuko dute programa, urteko lehen osoko bilkuran. Horri begira, bi taldeek nabarmendu dute «erabaki guztietan babesa gehitzen jarraitzea dela espiritua». «Programa dagoeneko webgunean eskegita dago, eta talde politiko guztiei bidali zaie, eztabaidatu egin nahi baita, eta, hala gertatzen bada, aberastu ere bai gainerako taldeen ekarpenekin, irundarrek Gobernu Programa argi bat izan dezaten Udalbatza osatzen dugun guztiok sustatua eta konprometitua», esan du amaieran Etxebestek. Programa osoa, lotura honen beheko atalean kontsulta daiteke.
