Zer dira koloretako hexagono horiek?
Irunen, kalean, hexagono formako koloredun eranskailuak jarri dituzte. Batzuetan 'Euskara' jartzen du, besteetan 'Kultura', 'Elkargunea', edo 'KA'.
Irungo kaleetan koloredun hexagonoak agertzen ari dira azken egunetan. Eranskailuak dira. Berdeen barruan Euskara jartzen du; arrosen erdi-erdian Kultura; eta urdinen zabalera osoa Elkargunea hitzak hartzen du. Badira horiak ere, K eta A hizkiak dituzte zentroan. Argazki batzuk ere zabaldu dituzte. Beltzez jantzitako sei kide, poligonoaren erpin banatan eserita agertzen dira. Hiriko toki esanguratsuetan ateratako irudiak dira.
Eranskailuak sare sozialetan agertzen hasi dira. Adibidez, Eztena Irun izeneko Facebook eta Instagram atarietan irudi geometriko horien gaineko informazio pixka bat gehiago dago, argazkiekin. Irunen dena eta batez ere ez dena plazaratzera gatoz, edo Zer behar dugu Irunen? moduko esaldiak aurki daitezke bertan. Gainera, jada badira K eta A hizkien eta hexagonoen zale direnak: “Ez dakizue nor garen gu. Baina begira nor dagoen gurekin”.
