Irungo lau euskal presoen alde 2.420 kilometro egitera deitu du Sarek
«Elkarbizitzarako, konponbiderako, bakerako eta etxerako bidea» irudikatu nahi dute. Bakarrik edo talde txikietan egin beharko dira kilometroak, eta ondoren, jardueraren eta kilometroen argazki bana bidali.
Euskal presoen alde kilometroak egitera deitu du Bidasoko Sare Herritarrak. Agerraldia eskaini dute gaur Palmera Monteron Etxerat elkarteko zenbait kidek eta Irungo presoen hainbat senidek, Izan Bidea dinamikaren baitan abiatutako Erronka aurkezteko. «Irungo 4 preso politikoak, Bera, Aitor, Fermo eta Iratxe, etxetik 2.420 km-tara daude sakabanatuta eta eskubideak urratuta. Bakoitzaren egoera ezberdina izan arren, guztiak bidegabeak dira», esan dute lehenik. Horregatik, kilometro horiek abiapuntu hartuta, 2.420 kilometro egitea proposatu diete bidasoarrei, finean, «elkarbizitzarako, konponbiderako, bakerako eta etxerako bidea» egiten laguntzea.
Pandemiak kilometroak taldean egiteko baimenik eman ez arren, beste bide bat aurkitu du Sarek. Bakarrik edo talde txikietan kilometroak egitera animatu dituzte herritarrak, sare sozialak baliatuta. Bi argazki bidali beharko dira, jarduerarena eta km kopuruaren bana hain zuzen ere. «Guztion artean egingo ditugun kilometroak kontagailutik kentzen joango gara. Ea horrela, guztion artean, kontagailua 0-ra eramatea lortzen dugun! Bidaltzen diren argazki eta km kopuruak sare sozialetan eguneratzen joango gara kontagailua 0-ra jaitsi arte», erantsi dute. Argazkiak helbide honetara edo 644 289 798 telefono zenbakira bidali beharko dira.
San Tomas Eguneko txapelketarik ez aurten
Iaz San Tomas Eguneko futbol txapelketa klasikoa berreskuratzeko apustua egin zuen Sarek, baina pandemiak aurtengoa bertan behera uztera behartu ditu tamalez. «Dena dela, Santo Tomas futbito txapelketa saria bai emateko asmo daukagula, beraz, data iritsi ahala, elkarbizitzaren eta eskubideen alde ekarpena egiten duen eragileari saria emango diogu. Edukiko duzue berri gehiago», erantsi dute.
Urtarrilean, manifestazioa
Gaurko agerraldia 2021ari begira jartzeko ere probestu dute. Urtarrila hasieran Bilbon egiten den urteroko manifestazioa aurten herrietara eramango dituztela esan dute, pandemia dela eta. Horregatik, urtarrilaren 9rako manifestazioa antolatu dute Irunen. Herritar guztiak animatu dituzte parte hartzera.