Stradivarius-eko langileek eserialdia egin dute, «lanpostuak eta etorkizuneko lan baldintzak bermatu gabe ixten dutela» salatzeko
Irungo denda bihar ixteko asmoa du Inditex-ek. Oraindik ere langile guztien birkokapena eta baldintzak adostu gabe daudela salatu du gaur ELAk.
Gaurko eserialdiaren irudia. Irungo Stradivarius dendako langileak berriro mobilizatu dira gaur, «denda langileen postuak eta euren etorkizuneko lan baldintzak bermatu gabe ixten dutela» salatzeko. ELA sindikatuak deituta, eserialdia egin dute langileek dendaren kanpoaldean protesta modura, 9:45etik 13:30era. Arratsaldean ere (17:00etan) leku berean elkarretaratzea egingo dutela iragarri dute goizean.
Joan den ekainean jakinarazi zuen Inditex enpresak Espainiar Estatuan 300 denda inguru itxiko zituela, ELAk salatu duenez, enpresaren helburua «salmenten %25a online izatea baita». Hala, urrian jakinarazi zieten bezala, bihar (hilak 28) itxiko dute denda. «Ordutik, ELA negoziaketetan aritu da enpresarekin, dendako langileek etorkizuneko lan baldintzak bermatzea helburu izanik. Hau da, langile guztien birkokapenak eta kaleratze ordain sariak negoziatzen jardun du enpresarekin», azaldu du sindikatuak.
Gainera, joan den asteko ostegunean langileen postuak eta baldintzak bermatzen dituen akordioa «itxi eta sinatzeari uko» egin izana leporatu diote enpresari. «Hau da, negoziatzen ari ziren birkokatze eta indemnizazioak idatziz adierazteari eta akordioa ixteari uko egin dio. Enpresaren esanetan, Irungo langileen egoera Madrilen negoziatzen denaren esku geratzen da».
Egoera kezkagarri horren aurrean, langileen egoera bermatzea exijitu dio ELAk Inditexi, Stradivariusek adostutako akordioa sinatu dezala. «Gure lan baldintzak hemen eta orain adostu nahi ditugu», erantsi dute.
