[Elkarrizketa] Garbiñe Loiarte: «Uste baino profesional euskaldun gehiago daude Osakidetzan»
Eskualdeko osasun zentroak eta Bidasoko Ospitalea ere arigune dira Euskaraldi honetan. Hiru zentroetan ia 100 bat lagun ari dira ahobizi edo belarriprest gisa.
Osakidetzako langileentzat bereziki zaila den egoera honetan, tartea atera duzue arigune gisa izena emateko. Zergatik?
Azken urteetako gure helburu nagusia euskararen ezagutzatik erabilerara salto egitea da, bide horretan urratsak egitea. Esperientzia ugari egin ditugu lanean ohitura horiek aldatzeko. Eta Euskaraldia erabat lotuta dago horrekin. Beraz, aukera paregabea izango da orain arte landutako horri guztiari jarraipena emateko. Aurtengo ediziorako asmo asko genituen, baina azkenean egoera kaskarrean harrapatu gaitu osasun larrialdiak. Bigarren agerraldi honetan gaixoen kopuruak goraka doaz etengabe, egoera oso konplikatua da, eta ahal izan dugun bezala, birmoldatu behar izan dugu aurtengo ediziorako aurreikusitakoa.
Beraz, nola aurreikusi duzue ariko zaretela?
Hondarribiko eta Irungo osasun zentroetan eta Bidasoko Ospitalean, guztira, ia 100 bat lagun ariko gara ahobizi edo belarriprest gisa. Egun horietan arretaren zenbateko handi bat euskaraz emango dugu, baina orain arte bezala. Harrera guneak eta zenbait kontsulta identifikatuko ditugu, indarrak hor jartzeko. Jendeak ikus dezala uste baino profesional euskaldun gehiago gaudela Osakidetzan. Hori errealitate bat da, asko gara, gero eta gehiago gainera, baina badirudi askok ez dutela hori ikusten.
Erabilera datuak dira kezka handiena Irunen. Nola eman bira egoera horri?
Uste dut Euskaraldiak lehen harritxo bat jarri zuela lehenengo edizioan, eta honetan berri bat jarriko duela. Gurean, adibidez, jende asko beldur da ea medikuak euskaraz ulertuko ote duen, eta gaztelerara jotzeko joera dago. Laneko ohiturak oso errotuta ditugu. Euskaldunek ohitura handia dugu lau lagun bagaude, eta batek euskaraz primeran ez badaki, denak gaztelerara jotzeko. Zaila da aurrera pausoak ematea, baina Euskaraldiak uste dut balioko duela horretarako, pixkanaka bada ere. Mezu hori helarazi behar dugu, jakin dezatela asko garela euskaldunak, eta horretarako lehen hitz hori euskaraz egitea funtsezkoa da. Lehenengo hitza euskaraz egiteko ohitura hartu behar dugu, eta uste dut Irunen sorpresa politak eraman ditzakegula. Izan ere, Irunen euskaldun asko dago, edo behintzat euskara ulertzen dutenak asko dira. Belarriprest asko egon daitezke ezkutuan, hauek guztiak sentsibilizatzea eta armairutik ateratzea beharrezkoa izango da edizio honetan eta hurrengoetan ere.
Gainera, uste dut ariketa honekin beti geratzen zaigula zerbait. Iritsiko da abenduaren 4a, baina oraindik ere sumatuko da Euskaraldiaren giroa, 2018an hori pasatu zen. Partaide guztietan arrasto bat utziko duela uste dut, urtez urte handitzen joango dena, ziur.
