Bosgarren gaua kalean, «sarbiderik eta baliabiderik gabe»
Harrera Sareko boluntarioak jada bost egun daramatzate migranteentzako aterpe kanpoko kanpin dendetan, egunero norbait kalean lo egitera behartu baitute.
Bosgarren egunez jarraian, kalean lo egin dute zenbait migrantek, boluntarioek jarritako kanpin dendetan. Gaur goizean Enplegu eta Gizarte politiketako sailburu Beatriz Artolazabalek egindako adierazpenei berehala erantzun die Irungo Harrera Sareak, haserre. Hedabideei bidalitako oharrean azaldu dutenez, Irungo Gurutze Gorriko dispositiboaren gainean galdetu diotenean, bertan sartzeko baldintzak «pertsona zaurgarrientzat okupazioaren arabera malgutu egiten» dituztela adierazi du. Honakoa ere bota duela salatu dute: EAEn pertsonei ematen zaien arreta, «arreta integrala» dela.
Bada, hitz horiekin oso haserre agertu dira sareko kideak, izan ere, aterpe kanpoan zenbait migrantek gaua pasatzen duten bosgarren eguna da gaurkoa, boluntarioek bertan jarritako kanpin denda batzuetan. «Pertsona zaurgarriek baliabiderik eta sarbiderik gabe jarraitzen dute».
«IHStik jakin badakigu asmoa eta borondate instituzional argia dagoela igarobidean dauden migratzaileen bazterketa kolektiboaren arazoa saihesteko. Sailburuak aipatzen duen malgutasunari dagokionez, malgutasuna ez da sistematikoa, eta ez da beti aplikatzen», esan dute amorruz. Asteburu honetan adibidez, agerraldi psikotikotan zegoen migrante batek aterpearen aurrean lo egin behar izan zuela gogoratu dute. «Bere egoera zein den jakinda, ez zioten sartzen utzi, nahiz eta Osakidetzako txosten mediku bat izan».
Harrera Sarea «bertatik bertara lan egiten duen eta gaia zehatz-mehatz ezagutzen duen kolektiboa izanik, guztiz prest» agertu da gure lurraldean ematen den «harrera integral hori hobetzeko». Bitartean, kalean jarraituko dute boluntarioek, borrokan.
