Europako funtsetarako proiektuei begira proposamen ugari egin ditu Elkarrekin Podemosek
Kultura, kirola, osasuna eta ingurumenarekin lotutako proposamenak egin dizkio udal gobernuari formazio moreak.
Nuño eta Etxebeste, agerraldi batean. Irungo Elkarrekin Podemos-Ezker Anitza taldeak Europako funtsetarako proiektuei begira zenbait proposamen egin berri ditu. Taldekoek gogoratu dutenez, uda eta udazkenean zehar, Irun Ekintzaren baitan, COVID-19ari aurre egiteko berpizte ekonomikorako ardatz nagusiak zehazteko bide orri bat osatu zuen udalaren eta hainbat erakunde pribatu eta publikoren partaidetza izan duen lantalde batek. Horren ostean, dokumentu bat aurkeztu zuten Irun Ekintazren Kontseilu Nagusian, taldekoen ahotan, «suspertze ekonomikorako Europako Funtsetan lehiatzeko bidaliko diren proposamenak osatzen dituzten proiektu nagusiak zehazten zituena».
Bada, Europak funtsetarako ezartzen dituen ildo estregikoak «ondo definituta» daudela diote, eta horrek «tarte txikia» uzten duela ideia eta proposamenak txertatzeko. «Elkarrekin Podemos IUn berehala ikusi genuen arretaz aztertu behar genuela dokumentua, lan esparruan txerta zitezkeen proiektuak eta proposamenak aztertzeko, eta lan sakon baten ondoren, proposamen sorta bat helarazi genuen udal gobernu taldera eta Bidasoa Bizirik agentziako zuzendaritzara». Ondorengoak dira proposamen horiek:
-
‘Hiritarren kultura zentroa (CBAren bigarren fasea)’ ekintza proposamenaren kasuan, izenburua aldatu eta ‘Hiritarrentzako kultura zentroa’ jartzea proposatu dute, hiru ardatz hauek egokitzeko: CBAren bigarren fasea, Oteiza
Basterretxea Etxea (sortzaileentzat), eta terma erromatarrak birgaitzea. -
Ekintza proposamen berri bat eranstea Txenperenea garatzeko, hirigintza garapen eraginkor eremu gisa, ardatz berde batekin eta kirol ekipamenduekin (horri esker, Plaiaundiko pistak lekualdatuko lirateke), aniztasun funtzionala duten pertsonen
gizarteratze programetara egokituta (gure hirikoentzat zein inguruko hirikoentzat). -
‘4.0. Osasun Proiektua’ ekintza proposamenaren barruan, hirirako beste anbulatorio baten (hirugarrena) eraikuntza gehitzea proposatu dute, «osasun arloko puntako teknologiekin,
Osasun Publikoarekin elkarlanean». -
Plaiaundiren ingurumen errekuperazioa gauzatzeko proiektu bat garatzea ere proposatu dute, Hegaztien Babes Bereziko Eremuari jarraitutasuna emateko, Eusko Jaurlaritzarekin elkarlanean.
