Ibon Azpilikuetak zabalduko du Gazteartean Expo-ren ikasturte berria
Ostiralean inauguratuko dute erakusketa. Argazkilariaren irudiek apainduko dituzte Martindozenea Gaztelekuko hormak.
Gaur aurkeztu dute erakusketa udaleko ordezkari Rebeca Gonzalezek eta Gaztelekuko ordezkari Garikoitz C. Muruak. Gazteartean programak erakusketa berri bat inauguratuko du ostiralean (hilak 16), ikasturte berriari hasiera emateko. Ibon Azpilikueta argazkilariaren lanek apainduko dituzte Martindozenea Gaztelekuko hormak. Naturako irudiak hartzen ditu bereziki argazkilariak, eta zianotipia izeneko prozedura baliatzen du inprimatzerako garaian; kolore urdina nagusitzen da irudietan horrela.
Azaroaren 6ra bitarte bertan jarraituko dute Azpilikuetaren argazkiek. Ostiral honetan aldiz, inaugurazioaren ostean tailer berezia eskainiko die artistak 12-17 urte bitarteko gazteei, 17:00etatik 20:00etara. Gehienez 10 lagun bertaratu ahal izango dira. Baina interesa dutenak ez daitezela larritu. Izan ere, etxetik bisitatzeko aukera ere izango da, bisita birtual bati esker (ostiralean bertan lotura honetan eskuragarri izango da esteka).
Hurrengo erakusketaren protagonista Andrea C. Miranda izango dela iragarri du udalak. Ikasturte berriko erakusketak eta xehetasun guztiak, hemen kontsulta daitezke.
