BATeko gazteak bost dominarekin itzuli dira Durangotik
18 urte azpikoen Euskadiko Txapelketa ona jokatu dute irundarrek.
Asteburu oparoa izan dute Bidasoa Atletiko Taldeko (BAT) 18 urte azpiko gazteek. Asteburuan taldeko zazpi kirolari Durangon jokatutako Euskadiko Txapelketan lehiatu dira, ederki gainera. Guztira, bost domina ekarri dituzte handik.
Lehena urrezkoa izan da, Irune Muguruzak 400 metro hesietan eskuratutakoa. Denboraldiko marka onena ezarri du (1.02.21) irundarrak. Paula Añorga (pertika saltoan) eta Lucia Arrizabalak (200 metroetan) aldiz, zilarrezko domina bana eskuratu dute. Arrizabalak ere brontzezkoa eskuratzeko aukera izan du asteburuan (100 metro hesietan), eta harekin batera, Amaiur Errazki ere beste batekin itzuli da Durangotik.
Iñigo Lavado izan da taldeko mutil bakarra Durangon. 110 metro hesietan seigarren postuan sailkatu da, 16,55 segundoko markarekin. Malen de la Fuentek aldiz, ez du emaitza onik eskuratzeko aukerarik izan.
Espainiako Master Txapelketan, ordezkari bakarra
BATeko gaztetxoez gain, helduek ere asteburu mugitua izan dute. Kadiz-en jokatutako Espainiako Master Txapelketan parte hartu du Susana Ruiz Ofizialdegik. 800 eta 200 F45 probetan lehiatu da, zehazki, laugarren eta bosgarren postua eskuratuta.
