Hiriko familiak laguntzeko ia milioi eta erdi euroko partida onartu du udalak
COVID-19ak eragindako arazoei aurre egiten laguntzeko diru partida indartzea erabaki dute. Guztira, 1.438.138 euro banatuko dituzte.
Laborda, gaurko agerraldian. Irungo Udaleko Gizarte Ongizate saileko ordezkari Cristina Labordak agerraldia eskaini du. Bertan, COVID-19aren eragina dela eta, familiei laguntzeko diru partida indartzea erabaki dutela jakinarazi du. Zehazki, 1.438.138 euroko partida onartu dute familien eskaerei aurre egiteko (iaz baino %12a gehiago). Bi ataletan banatu dute laguntza: alde batetik gizarte larrialdietarako laguntzak eta bestetik, laguntza bereziak.
«Aurten aurrekontua indartu egin da pandemiaren ondorioek eragin ditzaketen beharrak arintzeko, alarma egoeraren hasieratik oso kontuan izan dugun funtsezko premisa baten barruan: gizarte arretari eustea, kolektibo ahulenak eta diru laguntzen kudeaketa lehenetsiz», esan du gaurkoan ordezkariak.
Gizarte larrialdietarako laguntzak 1.226.138 euroko inbertsioa izango dute, eta hiriko 600 familiarengan iritsiko dira. Gainerako guztia laguntza berezietarako bideratuko dutela zehaztu du Labordak.
