Aldundiak ere larunbateko eraso matxista gaitzetsi du
Arratsalderako iragarritako elkarretaratzera deitu dituzte herritarrak. 19:00etan bilduko dira, San Juan plazan.
Iaz San Juan plazan egindako elkarretaratzearen irudia. Gaur Irungo Udalak egin duen bezalaxe, asteburuko eraso matxista salatu berri du Gipuzkoako Foru Aldundiak, hedabideei bidalitako ohar baten bitartez. Erasoa salatu eta horren aurkako gaitzespena erakutsi dute, eta biktimari eta haren gertukoei elkartasuna adierazi diote.
«Foru Aldundiak, batetik, emakumeen giza eskubideen urraketa gehiagorik ez toleratzeko erakundeon jarrerarik irmoena erakutsi nahi du adierazpen honekin. Eta, bestetik, herritarrei kanal bateratu bat eskaini nahi die, erasoak jasaten dituzten emakumeen askatasunaren kontrakoa eta, ondorioz, emakume guztien eskubideen kontrako erasoen aurkako arbuioa adierazteko», esan dute aldundiko iturriek. Hala, bat egin dute udalak gaur arratsalderako antolatutako elkarretaratzearekin. Bertan, erakundearen ordezkari gisa, Miren Elgarresta Berdintasunerako organoaren zuzendaria izango da.
