Udal langile taldea osatzeko mozioa aurkeztu du Abotsanitzek
Bete gabeko lanpostuak eta behin-behinekotasuna udalaren arazo "larrienetakoa" dela iritzita, osteguneko osoko bilkurara eramango du gaia alderdiak.
![Irisgarritasuna hobetzeko asmoz galtzada-harriak egokitzen ari dira udal langileak.](https://bidasoa.hitza.eus/site/files/2020/02/harategi_kalea.jpg)
Udal plantilla osatzeko mozioa eramango du Abotsanitzek osteguneko osoko bilkurara, gaur jakinarazi duenez. Bete gabeko lanpostu “asko” egoteaz gain, udal langileen behin-behinekotasuna %60tik gorakoa dela dio alderdiak. “Hondarribiko Udalak duen arazo larrienetako bat, larriena ez bada, pertsonalarena da” iritzi dio taldeak.
Zabaldutako informazioaren arabera, ondokoak dira mozioak jasotako puntuak:
- 2015etik 2019 arteko epean onartuta dauden Enplegu Publikorako eskaintzak ekitaldi honetan gauzatzeko konpromisoa hartzea.
- 2015 aurretik kontratatuta ditugun aldi baterako kontratu bidezko langileak eta obra modalitatez edo zerbitzu zehatzetarako kontratatutakoak lanpostuen zerrendan sartzea eta kontratazioa egonkortzeko konpromisoa hartzea.
- Erretiroa hartzen duten langileen kontratazioa gauzatzeko konpromisoa hartzea.
- Lanpostuen zerrenda berri bat egikaritzeko beharrezkoa den lanketa partekatua abiatzea, 2021 urte amaieran indarrean izateko konpromisoa hartuz.
- Azpikontratatutako zerbitzuen bidez eskaintzen diren udal zerbitzuak udal langilego propioaren bitartez eskaintzeko hausnarketa prozesua irekitzea.