Nerea Bermejoren kartelak iragarriko ditu aurtengo sanmartzial bereziak
San Juan Harria, Junkaleko Andre Mariren eliza, udaletxea, San Martzial eta Aiako Harria hartu ditu irundarrak oinarri gisa.
Nerea Bermejo, kartelarekin. Aurtengo sanmartzialak «egungo egoerari egokituta» ospatu beharko dituzte irundarrek, eta udala dagoeneko festa berezietarako egitarau berezi bat prestatzen ari da. Egitarau hori plazaratu bitartean, aurtengo jaiak iragarriko dituen kartela aurkeztu berri du udalak. Nerea Bermejo irundarraren kartela aukeratu dute 2020ko San Pedro eta San Martzial jaien berri emateko.
Bermejok arkitektura ikasi zuen Donostiako Arkitektura Goi Eskola Teknikoan. 2011. urtean aldiz, Londresera abiatu zen, diziplina askotariko ikasketekin hasteko. Hiri ingurunean aditua da irundarra, eta bere lana ideiak irudikatu eta espazio berriak irudikatzea da. «Irungo jendearen alaitasuna eta festetako giroa islatu nahi izan dut», kontatu du kartelaren egileak. Irudirako, San Juan Harria, Junkaleko Andre Mariren eliza, udaletxea, San Martzial eta Aiako Harria hartu ditu oinarri gisa.
Udalak jakinarazi berri duenez, datozen egunotan aurkeztuko dute aurtengo sanmartzial jai berezietarako prestatu duten egitaraua.
Nerea Bermejoren kartela.
