Bederatzigarren Pechakucha edizioa, etxetik
Aurtengo topaketa online bidez egitea erabaki dute, antolatzaileen arabera, «KREA Bidasoa topaketaren esparruan ezin baita egin».
Iazko edizioaren aurkezpeneko irudi bat. Bidasoa Bizirik-ek Pechakucha edizio berri bat antolatu du, baina bederatzigarren hau modu berezian egingo dutela iragarri berri dute. Hondarribiko zein Irungo Udalekin elkarlanean, online bidez egitea erabaki dute, antolatzaileen arabera, «KREA Bidasoa topaketaren esparruan ezin baita egin». Hala, online bidez egingo dute aurtengoa. «Bidasoaldeko pertsonak garatzen ari diren proiektu sortzaile eta berritzaileak ezagutzeko aukera bat da», adierazi du Miguel Angel Paez Bidasoa Bizirik-eko presidenteak.
Topaketa hurrengo ostegunean (hilak 18) izango da, eta ordenagailutik edo telefono mugikorretik jarraitzeko aukera izango da (17:00etatik aurrera). Formatua sinplea izango dela azaldu dute antolatzaileek, ondorengo ideian oinarritu dute: 20 irudi x 20 segundo. Hau da, partaide bakoitzak 20 irudi proposatuko ditu (20 segundoz proiektatuko dituzte), eta horietan oinarrituta egingo dute aurkezpena. «Formatu horrek aurkezpen erakargarriak, laburrak eta, oro har, dibertigarriak eskaintzen ditu. Gainera, beren lana jendaurrean erakutsi nahi duten baina komunikabide masiboetarako sarbiderik ez duten pertsonentzako aukera bat da. Plataforma ezin hobea da», gehitu du Paezek.
Izena emateko epea jada zabalik dagoela azaldu dute Bidasoa Bizirik-eko iturriek, esteka honetan.
Lehen webinarra
Bestalde, biharko (hilak 11), Bidasoa Bizirik-ek lehen webinarra antolatu duela iragarri dute, «sormen sektoreari buruzkoa». 16:00etatik aurrera, eskualdeko sormen industrietan eta horren lotutako sektore ekonomikoetan zuzenean eta zeharka lan egiten duten hainbat artista, profesional eta enpresa elkartuko dira, euren esperientziak elkarbanatzeko. Biharkoan, Branding, moda, ikus-entzunezkoak, bideojokoak edota diseinuaren munduko enpresek hartuko dute parte, eta ondoren, mahai inguru bat izango da. «Aukera paregabea da Euskadiko hainbat tokitako enpresak eta ekintzaileak harremanetan jartzeko, elkar ezagutzeko eta lankidetzako proiektuak sortzeko» azaldu du Maria Serrano Bidasoa Bizirik-eko presidenteordeak. Webinarrean parte hartu ahal izateko, hemen izena eman beharko da.
