Aurtengo sanmartzialetako balkoi eta leiho politenek saria jasoko dute
Alde Zaharra-San Juan auzo elkarteak lehiaketa berezi bat antolatu dute aurtengo sanmartzialetarako, «kaleak kolorez eta jaiez janzteko» asmoz.
Aurtengo sanmartzialetan etxeko balkoitik edota sofatik gozatzeko ekitaldiak aurreikusten hasi dira. Aurtengo sanmartzial bereziei begira, Alde Zaharra-San Juan Auzo Elkarteak lehiaketa berezi bat antolatu du. Balkoi eta leihoak apaintzeko lehiaketa bat egingo dute aurtengo jaietan, «kaleak kolorez eta jaiez janzteko» asmoz.
Lehiaketan parte hartu ahal izateko, ezinbestekoa izango da auzoan bertan bizitzea, ondorengo kaleetan: Aldapeta, Pikoketa, Joakin Gamon, Berrotaran, Foruak, Legia, Nagusia, Fermin Calbeton (1-5), Nafarroa Hiribidea (1-5), Eliza (2-6), Arbelaitz, Leon Iruretagoyena, San Juan plaza, Prudencia Arbide, Señor Aranzate, Eguzkitzalea (2-18), Eguzkiza, Jesus, Larretxipi, Sargia, San Martzial, Peña, Contracalle, Travesia, Urdanibia plaza, Juncal (6-12), Pelegrin de Uranzu, Papinea, Pedro de Irizar, Salvador Etxeandia, Korrokoitz San Elena eta Ermita (2-48). Izen emateak aldiz, helbide honetara idatziz egin beharko dira, hilaren 20tik 25era bitarte. Helbide horretan, balkoi edo leihoetako argazkia atxiki beharko da, izen-abizenak, etxeko helbidea eta telefonoaz gain.
Berezitasun bezala, material birziklatuen erabilpena aintzat hartuko dute epaileek (hiru epaile izango dira). Baloratzerako orduan, konposizioaren originaltasuna, sormena, kalitatea, armonia, diseinua eta fintasuna kontuan hartuko dituzte.
Sari banaketa hilaren 29an egingo dute, eta egunean bertan jakinaraziko dute ekitaldiaren ordua eta lekua. Auzo Elkartekoek irabazleei albistearen berri emango diete, telefonoz edo helbidez.
