Krisiari aurre egiteko "diru publikoa mobiliza dezan" eskatu dio PSEk EAJri
Udal gobernu taldeak galdegindako kreditu modifikazioa "hiriaren jarduera ekonomikoa bultzatzera, eta soldatapeko zein langile autonomoen enplegua mantentzera eta babestera" bideratzeko beharra nabarmendu du Alvarezek.
Tokiko ekonomia eta enplegurako inbertsio publikoak eskatu ditu PSEren udal taldeak. 
COVID-19 gaitzak eragindako krisi egoerari aurre egiteko “diru publikoa mobiliza dezan” galdegin dio Hondarribiko PSE-EEren udal taldeak EAJren udal gobernuari. Hilaren 18rako aurreikusitako osoko bilkuran eztabaidatuko den kreditu modifikazioa “hiriaren jarduera ekonomikoa bultzatzera, eta soldatapeko zein langile autonomoen enplegua mantentzera eta babestera” zuzentzea ezinbestekoa iritzi dio Iosu Alvarez sozialisten bozeramaileak.
Hala, 10.575.450 euroko kreditu modifikazioa proposatu du hautetsiak, “altxortegian bildutako soberakina 52 milioi eurokoa dela kontuan izanda”. Aldaketa onartuko balitz ondoko proposamenak egingo lituzke talde sozialistak:
- Udal langile plantilla indartzeko 150.000 euro.
- Epe luzeko langabeentzako programa bereziak garatzeko 150.000 euro.
- Kontziliaziorako 15.000 euro.
- Komertzio bonoak ostalaritzara hedatzeko 330.000 euro.
- Eskola materialerako 50.000 euro.
- Informatika materialerako 25.000 euro.
- Osasun krisian zehar “rol garrantzitsua” bete duten GKEentzat 550.000 eta 25.000 euro.
- Herri autobus publikorako eta bideen egokitzapenerako 7.785.450 euro.
- Madalen karrikarako igogailurako 15.000 euro.
- Tudelenea eta Damarriko etxebizitza proiektuen hasierako azterketarako 100.000 euro.
- Alokairuak diruz laguntzeko 100.000 euro.
