Anaka auzoko jaiak, balkoitik eta sare sozialetatik
Gaur helduko da festa auzora, 18:00etako txupinazoarekin. Ekitaldi guztiak etxeko balkoitik eta sare sozialetatik jarraitu ahal izango dira, ezingo baita kalean jarduerarik egin.
Iazko jaien irudia. Argazkia: Anaka Auzo Elkartea. Aurtengo Anaka auzoko jaiak «bereziak eta ezberdinak» izango direla iragarri berri dute auzoko jai batzordeko kideek. Gaur (hilak 5) arratsaldean hasiko dituzte auzoko festak, eta igandera bitarteko luzatuko dute egitaraua. Ekitaldi guztiak etxeko balkoietatik eta sare sozialetatik jarraitu ahal izango dira, egungo egoerari egokitu behar izan baitute egitaraua. Antolatzaileen arabera, kalean ezingo da jarduerarik egin.
Honakoa da astebururako prestatu duten egitaraua:
- Ostirala (hilak 5):
- 17:00: Umeen margo lehiaketa abiatuko dute. Bakoitzak bere etxean egindakoa bidali beharko du ostiraleko 22:00ak baino lehen.
- 18:00: Txupinazoa sare sozialen bidez. Ondoren, Bidasoako Txarangako erraldoi eta buruhandien kalejira, online bidez ere.
- 19:00: Txemi Txekaren kontzertua sare sozialetan.
- 20:00: Pintxo potea balkoitik.
- 21:00: Mandragora Negra taldearen kontzertua sare sozialetan.
- Larunbata (hilak 6):
- 10:00: Elmer-en ipuina sare sozialetan, Haurtxokoek antolatuta.
- 11:00: Familian kirol saioa, argazkiak eta bideoak zintzilikatzeko deialdia egin dute.
- 14:00: Herri bazkaria. «Aurten bakoitzak bere etxean prestatu beharko du».
- 17:00: Zonzongo-rekin batukada sare sozialetan.
- 18:00: Diskofesta DJ Rulo eta Adrinen eskutik, sare sozialetan.
- 20:00: Remember 2020 Kontxiren eskutik.
- 22:30: Topa egiteko ordua jarri dute, balkoietan. Aipamen berezia egingo diote Jai Batzordeko kide Santiri.
- Igandea (hilak 7):
- 10:00: Txistulariak sare sozialetan.
- 11:00: Pata tortilla lehiaketa etxetik. Ondoren, dastaketa.
- 12:00: Irungo Udal Bandaren kontzertua sare sozialetan.
- 16:00-17:00: Etxean aurpegiak margotu eta mozorrotzeko jolasak egingo dituzte haurrekin.
- 17:00: Txokolatada etxetik.
- 17:30: Margo eta mozorro lehiaketako saridunak aurkeztuko dituzte.
- 18:00: Dantzak bakarka edo taldean.
- 20:00: Azken traka.
