Irungo alarde parekidea, bertan behera

Osasun larrialdia dela eta, ekainaren 30ean ekitekoa zen desfilea bertan behera uztea erabaki dute antolatzaileek.

2020/04/24

Aurten Irungo alarde parekideko kideek ez dute herriko kaleetan barrena desfilatuko. Larrialdi egoera dela eta, datorren ekainaren 30ean egitekoa zen desfilea bertan behera uztea erabaki berri dute, komunikatu batean azaldu dutenez. «Jakinarazi behar dizuegun ebazpena ez dugu, inondik inora, batere gogoko, eta horretara garamatzan arrazoia, hain gutxi. Baina, koronobirusaren ondorioz pairatzen ari garen osasun egoera larria dela eta, pandemiari aurre egiteko hartzen ari diren neurriekin bat eginez, Alarde Parekidearen Juntak erabaki du aurten, 2020an, uko egiten diogula Alarde a antolatzeari», adierazi dute.

Lehenik, maitasuna eta elkartasuna helarazi nahi izan diete osasun krisiaren biktimei eta haien senide guztiei. COVID 19aren krisiak aurtengoa eragotzi arren, irundar guztiak «bat eginez, inor atzean utzi gabe» egoeratik irteteko deia egin dute. «Aurten egingo ez dugun Alardearen indarra herritarron indarra da. Elkar ikusteko, besarkatzeko, txilibitua edo danborra joz elkarrekin desfilatzeko ezina ordea, bai bihur dezakegu adore eta kemen, gure gizartea, irundarrona, zatiketak atzean utzi eta batuago egon dadin, elkartasunez berdintasunez lotuago».

Itxaropen mezu bat ere helarazi nahi izan diete herrikideei: «Berriro beteko ditugu geure kaleak, geure kafetegiak, geure dendak Berriro egingo dugu topo geure senideekin, lagunekin, eta musu emango diogu elkarri. Baliatuko ahal dugu bizi garen egoera berri eta mingarri hau pertsona hobeak eta herritar hobeak izaten ikasteko»

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.