Herritarrak informatuta egon daitezen zuzeneko emanaldia eskaini du EH Bilduk
Esperimentua modu positiboan baloratu ondoren ez dela azken saioa izango iragarri du koalizio abertzaleak.
Hondarribiko EH Bilduk zuzeneko emanaldia eskaini du militanteek eta oro har, herritarrek, informazio guztia jaso dezaten. 
Covid-19ak eragindako egoeraren aurrean, herritarrak informatuta egoteko erronkari aurre egin nahi izan dio EH Bilduk, eta zuzeneko saioa eman dute Xabier Isasi bozeramaileak eta Xabi Bengoetxea zinegotziak Youtube plataforman. Kontent emaitzarekin, aipatutako sare sozialean eta koalizioaren blogean zintzilik utzi dute bideoa denen eskura. Halaber, ez dela azken saioa izango aurreratu dute koalizioko kideek. Osasun krisia luzatu bitartean egoera eta erabaki politikoen berri emateko erabiliko du kanala Hondarribiko EH Bilduk. Bertan ikus daiteke bideoa.
