«Martxoaren 2an alde egin eta apirilaren 3rako hemen nintzen berriro»
Atzerrira lanera joan, eta etxetik irten ezin. Horixe da Sandra Felipe gazteak Polonian topatu zuen panorama. Konfinamendua Irunen egitea erabaki du.
Atzerrian direnez gain, badira atzerritik itzuli behar izan dutenak, birus madarikatuak behartuta. Hilabete eskas baino ez du eman 24 urteko Sandra Felipe irundarrak Polonian. Birusak eta hari lotua doan konfinamenduak, praktikaldi profesionala nahi bezala egiteko aukera kendu diotela esan dio HITZA-ri.
Non harrapatu zintuen pandemiak?
Krakovian.
Zertan ari zinen bertan?
Praktikaldi bat egiteko Erasmus beka bat jaso nuen. Hiru hilabete eman behar nituen kosmetika enpresa batean.
Ez duzu denbora askorik eman Krakovian, ezta?
Hilabete bakarra eman nuen han. Martxoaren 2an alde egin nuen Irundik eta apirilaren 3rako hemen nintzen berriz ere.
Noiz jakin zenuen itzuli beharko zenuela?
Guk hartu genuen itzultzeko erabakia. Beka seiri eman ziguten, eta seiok elkarrekin bizi ginen.
Atzerrira lanera joan eta etxetik irten ezin, orduan.
Erosketak, kirola eta paseoak, hori baino ezin genuen egin etxetik kanpo. Badakit hemen egoera okerragoa dela eta kirolik ere ezin dugula egin. Baina Krakovian geunden, etxekoengandik urrun, eta ezingo genuen ezer egin. Asko eztabaidatu ondoren handik joatea erabaki genuen.
Polonian, egoera hemen bezain larria da?
Ez hain larria, oraintxe bertan Polonia osoan 7.000 kasu inguru daude. Guk alde egin genuenean 2.000 bat gaixo ziren.
Horrelako zerbait gerta zitekeela uste zenuen?
Egia da Poloniara joan ginenean Europa osoan kasuak atzematen ari zirela. Baina ez nuen espero. Martxoaren 2an txantxetan hartzen genuen denok koronabirusa. Nire ustez gehienek horrela bizi izan dute, eta nik ere horrela bizi dut. Kutsatuta ere, gehienez ohean bi aste pasako nituela pentsatzen nuen eta nire bizitzarekin normal jarraituko nuela. Baina ez da hala izan.
Bekaldiari berrekiteko aukerarik izango duzue?
Ez dakigu. Prozesu guztia kudeatu duen arduradunak esan digu bekak mantentzen ahaleginduko dela. Baina nahiz eta aukera izan, ez dakigu noiz. Argi dagoelako egoera hau ez dela pare bat hilabeteko kontua izango. Baina argi genituen ere zeintzuk izan zitezkeen ondorioak itzultzea erabaki genuenean.
