Herritarrek adierazitako babesa eskertu dute Bidasoa ospitaleko langileek
Mediku eta larrialdi zerbitzuetako profesionalek egindako lana eta esfortzua agerian uzteaz gain, erakunde publikoen, elkarteen, enpresen eta GKEen sostengua eskertu dute.
Bidasoko erakunde sanitario integratuko (Bidasoko ESI) langileek jasotako babesa eta sostengua eskertu nahi izan zuten ostiralean (hilak 20) argitara emandako ohar batean. Bertan, euren jarduna eta lehentasunak aldatzera behartuta daudela adierazi zuten, «esfortzu guztiak Covid-19 epidemiari aurre egitera» bideratzea ezinbestekoa baita.
Egoera honen aurrean profesionalek, norbanakoek eta eragile ezberdinek erakutsitako jarrera txalotu nahi izan zuten profesionalek oharrean. Zentzu horretan, gizarteak, mediku eta larrialdi zerbitzuetako profesionalek, zaharren egoitzetako langileek, erakunde publiko ezberdinek, enpresa pribatuek, elkarteek, eta gobernuz kanpoko erakundeek (GKE) erakutsitako sostengua, egindako esfortzua eta emandako laguntza eskertu nahi izan zuten.
Era berean, maskarak egiteko, profesionalei ostatua emateko, otorduak prestatzeko… prestutasuna agertu duten guztiei ere eskerrak eman zizkien Osakidetzako profesional taldeak testuan.
