TAO langileen kontratazio prozesua hasteko eskaera egin du PSE-EEk
Aste honetan hiru eskaera erregistratu ditu sozialisten udal taldeak, tartean, Madalen Gain eskaileren eta skate parkaren ingurukoak ere.
Erabiltzaile bat Bentako aparkalekuko TAO makinan ordaintzen. 
PSE-EEren Udal Taldeak hiru eskaera erregistratu ditu aste honetan Hondarribiko Udalean. Horietako lehenak, TAO langileen kontratazio prozesuari erreferentzia egiten dio, eta udal gobernu taldeari prozesua has dezala eskatzen dio lan poltsa osa dezan.
Bigarrenik, Madalen Gaineko eskaileren zati baten itxierarekin lotuta dago, eta erabaki horren gaineko azalpenak eskatu ditu talde sozialistak eskaera horren bitartez. Era berean, noiz egongo diren berriz ere erabilgarri galdetu dio gobernu taldeari.
Azkenik, kirol instalazioetan kokatutako skate parkaren inguruan gurasoen kexak bere egin ditu talde sozialistak. Izan ere, «droga kontsumitzen ari ziren gazteekin topo egin dute bertan, gurasoek zein adin txikikoek azaldu digutenez». Hori dela eta, agente zibikoen edota udaltzainen kontrol zorrotzagoa inguruan eskatu dio alderdiak tokiko gobernuari.
