35 traineru, Hondarribiko XX. Jaitsieran
Larunbatean da estropada. 12:00etan hasiko dira ateratzen traineruak, banaka, Hondartza paretik. Gazteen, seniorren eta beteranoen ontziak izango dira.
Iazko jaitsieraren irudia. Hasi dira traineruak aurredenboraldiarekin. Hurrengo lehia bertan da, Hondarribiko XX. Jaitsiera. Larunbatean da, eta 12:00etan hasiko dira izena emanda duten 35 traineruak bogan. Gazte Mailako, beteranoen, eta seniorretako emakumeen eta gizonen traineruak daude. Erlojupeko saioa da, banaka aterako dira ontziak.
Hondarribiko hondartzaren pareko eremua erabiliko dute, eguraldiak baimentzen badu, estropada egiteko. Gizon seniorren kasuan, Kontxako Banderako sailkapen estropada egiten zeneko bidea egingo dute (1982ra arte egiten zen Hondarribian sailkapen lehia hori). Hau da, udako Hondarribiko bandera hasten den tokitik hasiko dira traineruak, itsasorantz joango dira ziaboga bakarra eginez. Hau da: luze bat itsasorantz eta bueltakoa hondartzarantz egingo dute. Estropada ofizialen luzera du eremuak.
Gazteen, beteranoen eta emakumeen bidea motzagoa izango da, gutxi gorabehera gizon seniorrena baino heren bat laburragoa (behean planoa).
Honakoak dira konfirmatuta dauden parte hartzaileak:
- Gazte Mailan: San Juan.
- Beteranoen Mailan: Ibaialde, Endaika, ZAE Badok 13 B, Mundaka, Zumaia, ZAE Badok 13 A, Fortuna, Plentzia.
- Emakumeen traineruak: Mundaka, Lapurdi, Isuntza, TAK Oria, Zumaia, Donostiarra, Arraun Lagunak, Orio, Hondarribia.
- Gizonen traineruak: Mutriku, Portugalete, Isuntza B, Donostiarra B, Hondarribia B, Lapurdi, Zumaia, Arkote, San Juan, Getaria, Deusto, Zarautz, San Pedro, Isuntza A, Donostiarra A, Bermeo, Hondarribia A.
Estropada eremuaren planoa. Irudia: Hondarribia Arraun Elkartea.
