Iridoy: «Santano alkatearen egungo oposizio eraikitzaile eta alternatibo bakarra gara»
2020ko aurrekontu akordioen ostean, Irun egoera berri batean sartu dela dio EAJk, jeltzaleek «zeresan handia duen aro berri batean».
Xabier Iridoy. 2020ko udal aurrekontuen akordioaren harira, EAJk zenbait kontu argitu nahi izan ditu. «Nahi eta uste dugun proiektu honek ez dituela hiriak dituen beharrak %100ean erantzuten, honen onarpena errazten zuen abstentzioa eman genuen», adierazi du Xabier Iridoy bozeramaileak gaur eskainitako agerraldian. Orduz geroztik, Irun egoera berri batean sartu dela dio, EAJk «zeresan handia duen aro berri batean».
Gabezia ugari aurkitu dituzte jeltzaleek PSE-EE, Elkarrekin Podemos-Ezker Anitza eta EH Bilduren arteko aurrekontu akordioetan. Aparkalekuak, immigrazioa, adinekoen egoera, mugikortasuna eta abandonaturiko proiektuak arintzeko proiektuak faltan sumatzen ditu Irungo EAJk eta beste behin Santanoren taldeari eurekin adostu nahi ez izana leporatu diote.
«Santano alkateak, modu esklusiboan eta bakarrean akordio markoa hautsi zuela nabarmendu genuenean, agerian geratu zen, batetik, adosteko orduan EAJ ez dela inoiz izan PSEren lehentasun taldea, eta bestetik, alkateak akordioan adostutako araua ez zuela bete», esan du gaurko agerraldian Iridoyk. Sozialisten fidagarritasun eza nabarmendu dute.
Amaitzeko, Irungo herritar guztien interesak eta beharrak defendatzen jarraituko dutela dio bozeramaileak. «Santano alkatearen egungo oposizio eraikitzaile eta alternatibo bakarra gara», gehitu du Iridoyk.
