Zein izan da aurtengo Irungo kirolari eta talderik onena?
Hilaren 27an aukeratuko dituzte aurtengo Irungo kirolari eta talderik onena. Aurten gainera Irundarron Saria banatuko dute; herritarrek bozkatuko dute.
Borja Olazabal, gaurko agerraldian. Hilaren 27an aukeratuko dituzte aurtengo Irungo kirolari eta talderik onena. Gaur jakinarazi du Borja Olazabal Irungo Udaleko Kirol arloko ordezkariak Musika Eskola eta Kontserbatorioko aretoan izango dela ekitaldia. 19:30ean hasiko dute.
Ohitura den bezala, urteko emakumezko eta gizonezko kirolari onenaren eta talde onenaren saria emango dute. Berritasun gisa, aurten Irundarron Saria banatuko dute. Herritarrek aukeratu beharko dute zeinek eramango duen, bozketa bidez. Hilaren 14tik 23ra bitarte bozkatzeko aukera izango da, Irun Txartela erabilita.
Sariez gain, aurten urteurren berezia ospatu duten taldeek ere saria jasoko dute. Hala, Kurpil Kirolak-ek /75 urte bete ditu), Irungo Txirrindulari Taldeak (50 urte bete ditu) eta Txingudi Errugbi Kluba (50 urte bete ditu) omenduko dute.
Ekitaldia biribiltzeko, rap oilar borroka bat eskainiko dute Alex Fernandez irundarrak eta Igor Diaz hondarribiarrak.
