Harrera egin diote alkateak eta kirol zinegotziak Ion Areitiori
Trialeko Munduko Txapelketan lortutako hirugarren postuarengatik zoriondu eta haren kirol ibilbidea balioan jarri nahi izan dute modu horretan.
Txomin Sagarzazu alkateak eta Juan Luis Silanes kirol zinegotziak harrera egin diote Ion Areitiori udaletxean. 
Txinan egindako Trialeko Munduko Txapelketan lortutako brontzezko domina dela eta, harrera egin diote gaur goizean Ion Areitiori Txomin Sagarzazu Hondarribiko alkateak eta Juan Luis Silanes kirol zinegotziak. Udaletxean elkartu dira hiruak kirolariak egindako lana balioan jartzeko helburuarekin. Izan ere, kirol ibilbide emankorra demostratzen ari da Areitio; aurtengoaz gain, zilarrezko domina lortu zuen 2018ko Trialeko Munduko Txapelketan, eta brontzea 2017an zein 2016an.
Hala, Hondarribiko Udalak Urrezko Intsignia eman zion 2018ko irailaren 7an, «kirol emaitza bikain eta balio nabarmenen bidez, gazteek Hondarribiko gizarteari egiten dioten ekarpenaren adibide ezinbestekoa» dela argudiatuta. Egun horretan HITZAk egindako elkarrizketa bertan irakur daiteke.
