Euskal presoen aldeko golak sartuko dituzte Uranzu berrian
Dagoeneko 20 talde baino gehiagok eman dute izena San Tomas Eguneko Futbito Txapelketan: «oso pozik gaude irundarrek emandako erantzunarekin, gure aurreikuspenak erabat gainditu dira», diote Saretik.
Uranzu berrian jokatuko dituzte partidak. 25 urteko etenaldiaren ostean bueltan da San Tomas eguneko futbito txapelketa klasikoa. Sarek berreskuratu du, eta ohiturari jarraituz, hilaren 21ean egingo dute, Uranzu pilotalekuan. Joan den ostegunean ofizialki aurkeztu zuten, pilotaleku berrian.
Sareko kide Odei Escuderok azaldu duenez, «presoen afera ahalik eta gehien gizarteratzeko», eta bestetik, «irundar askoren memorian beti egon den txapelketa hori berreskuratzeko» ekin diote txapelketa berreskuratzeari. Jakinarazi berri dutenez, dagoeneko 20tik gora taldek eman dute izena: «oso pozik gaude irundarrek emandako erantzunarekin, gure aurreikuspenak erabat gainditu dira», gehitu du.
9:00etatik 19:00ak bitarte luzatuko dute txapelketa, eta talde bakoitzeko bost jokalari (+ atezaina) onartuko dira. Taldeak mistoak ere izan daitezke, eta bide batez, emakumeei egin diete parte hartzeko deialdia. Izen emateak helbide honetara idatziz egin daitezke.
