Arsenalek Emery kanporatu du
Unai Emery hondarribiarra ez da izango aurrerantzean Londresko Arsenal taldearen entrenatzailea. Atzo, Europa Leaguen galdu egin zuen.
Unai Emery. Unai Emery hondarribiarrak ez du Londresko Arsenal futbol taldea entrenatzen jarraituko. Taldearen zuzendaritzak erabaki du kargua kentzea Emeryri. Atzoko Europa Leagueko azken emaitza txarra izan da erabakia hartzeko azken aurrekaria.
1-2 galdu zuen Arsenalek bere etxean Alemaniako Eintracht Frankfurt taldearen kontra. Hala ere, Londresko taldeak Europa Leagueko F taldeko lidertza mantentzen jarraitzen du, 10 puntu dituelako, bigarren den Eintracht-ek bat gutxiago duelarik. Ligaxkako azken partida Standard Liege taldeko hirugarrenaren kontra (zazpi punturekin) du Arsenalek.
Premier League Ingalaterrako Ligan zortzigarren postuan dela utzi du Arsenal Emeryk. Champions Leagueko postuetatik zortzi puntura daude egun gunner-ak.
Arsenal zuzentzen hondarribiarrak eman dituen 18 hilabeteetan, taldeak 43 partida irabazi ditu, 15 berdindu, eta 20 galdu.
Unai Emeryren entrenatzaile ibilbidea:
- 2005-2006, Lorca.
- 2006-2008, Almeria.
- 2008-2012, Valentzia.
- 2012 (maiatza)-2012 (azaroa) Moskuko Spartak.
- 2013-2016, Sevilla.
- 2016-2018, Paris Saint Germain.
- 2018-2019, Arsenal.
