Gabonei begira "jostailu gida ez sexista" landu nahi du EAJ-k
Belaunaldi berriei "eredu hezitzaile-parekidea" gerturatzeko beharra nabarmendu du talde jeltzaleak.
Josune Gomez eta Xabier Iridoy. Hilaren 25eko Indarkeria Matxistaren Kontrako Egunaren harira, Irungo EAJ taldeak zenbait mezu helarazi dizkio udal gobernuari. Lehenik, taldeko bozeramaile Xabier Iridoyk iaz Irunen 185 indarkeria matxista kasu eman zirela gogoratu du. Egoera horren aurrean, Irungo Udalak antolatutako jarduerak nahikoak ez direla salatu dute: “harago joan beharko luke”. Hala, belaunaldi berriei “eredu hezitzaile-parekidea” gerturatzeko beharra nabarmendu dute jeltzaleek.
Horretarako, jostailu gida ez sexista egitea proposatu diote udalari. “Irungo EAJtik berdintasuna txikitatik sustatzen lagundu dezaken eta hezkidetza kontuan duen, jostailu gida ez sexista lantzea proposatzen dugu”, adierazi du Iridoyk. Gidak, publiko ezberdinetara bideratua beharko lukeela iritzi du jeltzalea; alde batetik, umeei eta gazteen gurasoei, eta bestetik, hiriko dendei eta eskola zein ikastolei.
Amaitzeko, gida hiriko elkarteekin elkarlanean osatu beharko litzatekeela nabarmendu du Iridoyk. “Berdintasunaren inguruan ditugun gizarte eragileekin eta herritarrekin lankidetzan aritu behar du udalak”.
