EAJ: "Bizikidetza eta Aniztasun Plan bat behar du Irunek"
Plana osatzearen garrantzia nabarmendu dute Xabier Iridoy eta Lander Ugartemendiak, "hiriari etorkizun hobe bat eskainiko dion gobernantza ereduan sakontzen lagunduko duena".
Xabier Iridoy eta Lander Ugartemendia. Irungo EAJ taldeko bozeramaile Xabier Iridoyk eta zinegotzi Lander Ugartemendiak agerraldia egin dute gaur batzokian. Bertan, hiriak Bizikidetza eta Aniztasuna plana behar duela nabarmendu dute. “Irungo egoera geografiko eta soziopolitikoak bultzatu gaitu hiri anitza, eta, era berean, abegikorra izatera. Halaber, urteen joan etorrian irundar herritartasunaren osaera ere aldatzen joan da”, adierazi di Iridoyk. Hori dela eta, Irunek aniztasunerako eta elkarbizitzarako plan bat behar duela azaldu dute, “hiriari etorkizun hobe bat eskainiko dion gobernantza ereduan sakontzen lagunduko duena”.
Errefuxiatuekin, migrazioarekin eta kultur aniztasunarekin zerikusia duten eztabaidak abordatzearen beharra nabarmendu dute jeltzaleek. Horregatik, lau ardatz estrategiko plan bat proposatu du EAJk: aniztasun kulturala, aniztasun funtzionala, bakearen kultura eta giza eskubideen kultura. “Guk, jakina, bide horretan sinesten dugu, elkarbizitzan, oinarrizko askatasunean eta eskubideetan. Elkarte irundar irekia, inklusiboa, baketsua, parekidea, heterogeneoa, kultura artekoa, duina eta soziologikoa sustatu eta eraiki nahi dugu”, gehitu dute.
Amaitzeko, Iridoyk nabarmendu du plana elkarlanean egitearen beharra. Hala, gizarte eragileekin lankidetzaren aldeko apustua egingo dute. Horretarako, prozesu ireki bat egin nahi du EAJk. “IEz dugu egungo gobernuaren estiloa konpartitzen, honek ez du akordiorako alde lan egiten eta”.
