Zaldunborda bertan behera uzteko eskatu dio Eusko Legebiltzarrak udalari
«Iraunkortasun ekonomikoaren, sozialaren eta ingurumenaren aurkakoa» dela iritzita, proiektuaren aurka agertu da Gasteizko parlamentuaren gehiengoa EAJ eta PSE izan ezik.
Iker Casanova legebiltzarkidea EH Bilduren egoitza nagusian Zaldunbordaren harira egindako beste agerraldi batean. 
Eusko Legebiltzarraren gehiengoa, EAJ eta PSE-EE ezik, Zaldunbordako proiektuaren aurka agertu zen atzo EH Bilduk tokiko merkataritza sustatzeko bultzatutako eztabaida monografikoaren harira. Elkarrekin Podemosek eta PPk bat egin zuten koalizio abertzaleak Zaldunbordako proiektua bertan behera uzteko egindako proposamenarekin. Hala, Eusko Jaurlaritzari zein Hondarribiko Udalari proiektua geldiarazteko galdegin zien parlamentuaren gehiengoak «iraunkortasun ekonomikoaren, sozialaren eta ingurumenaren aurkakoa» dela argudiatuta.
Iker Casanova legebiltzarkideak egindako adierazpenen arabera, «saltoki handiei buruzko legearen kontrakoa» da outlet erraldoiaren egitasmoa. Are gehiago, ez dio soilik Hondarribiari eragingo «eskualde osoko» tokiko merkataritzari «kalte handia» egingo diola baizik. Ildo horretan, «denden txikizioaren arduradun» egin zituen Iñigo Urkullu lehendakaria eta Sonia Perez Merkataritza sailburua zein Iñaki Arriola Lurralde Antolamendukoa.
Zaldunbordako proiektua gelditzeko exijituz hainbat proposamen aurkeztu ditu dagoeneko EH Bilduk. Gipuzkoako Foru Aldundian aurkeztutakoa esaterako, atzera bota zuten EAJk eta PSE-EEk. Bestalde, Eusko Legebiltzarreko plenoan proposatutakoa zegokion batzordera bideratu zuten, kasu honetan ere, bi alderdi horiek.
