"Demokraziaren aurkako eraso larria" salatzeko giza katea egingo dute bihar Irunen
Berriz ere kalera aterako dira irundarrak, Kataluniako politikari independentistei Espainiako Auzitegi Gorenak ezarri dizkien zigorrak salatzeko.
2017an irundarrek Kataluniaren alde egindako giza katea. Kataluniako politikari independentistei Espainiako Auzitegi Gorenak ezarri dizkien zigorrak salatzeko beste mobilizazio bat iragarri du Gure Eskuk Irunen. Bihar (hilak 18) giza katea osatuko dute epaitegitik Zabaltza plazaraino. 19:30ean bilduko dira.
Epaia “demokraziaren aurkako eraso larria” dela salatu dute Gure Eskuko kideek. Epaiaz gain, prozesu judiziala ere “injustua” izan dela diote, behin behineko espetxealdiarekin presoen eskubideak urratu direla. Epaiketa politiko honen “amaiera justu bakarra” absoluzioa dela gogoratu dute. Era berean, epaiak “eskubide zibil, politiko eta kolektiboak kriminalizatzeko” aukera eman duela diote, manifestazio, adierazpen, protestarako eta bozkatzeko eskubidea urratu nahi dietela kataluniarrei.
Etorkizuna erreferendum bidez erabakitzeko eskubidea nabarmendu dute, “libreki eta demokratikoki”. Era berean, larunbateko (hilak 19) Donostiako manifestaziora deitu dituzte herritarrak, auziko presoen askatasunaren alde.
Amaitzeko, bidegabekeriaren aurrean elkartasunaren bidea hartuko dutela nabarmendu dute. “Oztopoen aurrean, irudimena eta ahalegin kolektiboa. Erreferenduma ez da delitua. Defenda dezagun gure erabakitzeko eskubidea. Gure esku dago”.
