Motorrean bidaiatzen zuten bi irundar larri zauritu dira auto baten kontra talka egin ondoren
Hondarribiko GI-636 errepidean izan zen istripua larunbat gauean; gertatutakoa argitzeko lekuko bila ari da Ertzaintza.
Irungo 47 urteko gizon bat eta 46 urteko emakume bat larri zauritu ziren larunbat gauean GI-636 errepidean gertatuko istripuan. Donostiako noranzkoan izan zen ezbeharra, gasolindegi baten ondoan, 22:20 inguruan.
Ertzaintzak jakinarazi duenez, Opel Insignia batek eta BMW motozikleta batek talka egin zuten eta ondorioz, bi motor bidaiariak airean atera ziren. Zaurituei arreta emateko bertaratu ziren larrialdi zerbitzuak, eta azkenean, Donostia Ospitalera eraman behar izan zituzten bi irundarrak.
Gertatutakoa ikertzen ari da Ertzaintza eta bide horretan, horren inguruko argibiderik eman dezakeen lekuko bila ari da. Hortaz, informazioa duen edozeinek 943539125 telefono zenbakira dei dezala eskatu du.
