Aldaketa klimatikoaren kontrako neurriak hartzeko mozioa aurkeztu du EH Bilduk
Irungo Udalak Larrialdi Klimatiko egoera deklaratzea eta bere eskumenen baitan aldaketa klimatikoari aurre egiteko "politika eraginkorrak" garatzea eskatu dute.
Oihana Briones, Ane Unanue eta Jokin Melida. Gaur egiten ari diren udalbatzan Irungo EH Bilduk aurkeztutako mozio bat eztabaidatzen ari dira. Izan ere, aldaketa klimatikoaren aurkako “neurri zehatzak” hartzeko mozioa aurkeztu berri du talde subiranistak. “Larrialdi klimatikoa datozen urte eta hamarkadetako agenda baldintzatzera etorri da, gure ongizatearentzako mehatxu nagusietarikoa baita, benetako zibilizazio erronka bat”, dio Jokin Melida bozeramaileak.
Egun, aldaketa klimatikoa gazte askoren kezka nagusi bihurtu dela diote, “dagoeneko ondorioak atzematen hasiak baikara”. Honen kontra emandako pausoak “guztiz ez nahikotzat” jo ditu EH Bilduk. Eta aurkeztu berri duten mozioaren bitartez, “egoeraren larritasuna aitortzea” dute helburu. Hala, besteak beste, Irungo Udalak Larrialdi Klimatiko egoera deklaratzea eta bere eskumenen baitan aldaketa klimatikoari aurre egiteko “politika eraginkorrak” garatzea eskatu diote mozioaren bitartez.
Taldeak Twitter bidez adierazi berri duenez, talde politiko guztien artean hitz egin ostean, adierazpen bateratua onartuko du Irungo Udalbatzak.
