Jaietako musika emanaldiak prestatzen hasi dira Amute-Kostako bizilagunak
Auzo batukadan eta kalejiran parte hartzeko deialdia luzatu du bizilagun elkarteak; txiki eta gaztetxoei bestalde, Musika Festa ekitaldira hurbiltzeko eskaria helarazi die.
Amute-Kostako jaiak prestatzen ari dira, tartean, batukada, kalejira eta Musika Festa 
Amute-Kostako Auzo Elkartea 2019. urteko jaiak buru-belarri prestatzen dabil hil honetan zehar. Oraingoan, Musika Festan, kalejiran eta auzo batukadan parte hartzeko deialdia helarazi die elkarteak bizilagunei. Horretarako, aldez aurretik izango diren deialdietara hurbiltzeko gonbidatu ditu.
Musika Festa sei eta hamasei urte arteko ume zein gaztetxoei zuzendutako jarduera izango da. Azaldutakoaren arabera, musika tresnaren bat jotzen dutenei zuzenduta dago deialdia. Bertan, parte hartzaile bakoitzak aukeratutako abesti bat jo ahal izango du eta «guk txalo zaparrada emango dizugu». Ekitaldian parte hartu nahi dutenek Amute janari dendan izena eman beharko dute osteguna baino lehen.
Auzo batukadari eta kalejirari dagokienez, ostiralean egingo dute bilera auzo elkartearen egoitzan, 19:00etan abiatuta.
