"Irungo hobekuntza eta pertsonen ongizatea bultzatzeko" zuzenketak aurkeztu ditu EAJ-k
EAJ taldeak zenbait zuzenketa egin berri dizkio joan den ostiralean udal gobernuak kreditu aldaketarako osatu zuen proposamenari.
Xabier Iridoy bozeramaileak jakitera eman berri ditu zuzenketak. EAJ taldeak zenbait zuzenketa egin berri dizkio joan den ostiralean udal gobernuak kreditu aldaketarako osatu zuen proposamenari. “Gure borondatea adostea da, bai gobernu sozialistarekin, bai gainerako udal taldeekin”, adierazi du Xabier Iridoy bozeramaileak. Hala, proposamen sorta bat aurkeztu dute jeltzaleek, “Irungo hobekuntza eta pertsonen ongizatea bultzatzeko”.
Udal gobernu taldeak kredituen aldaketarako dituen proposamenak helarazi dizkietela azaldu du
Udal gobernuaren proposamena aztertu ondoren, EAJk “oinarrizko hainbat behar identifikatu” ditu. Zuzenketekin, ostiralean aurkeztutako proposamena “hobetu eta osatu” nahi du talde jeltzaleak.
Orotara, gehitzeko 19 zuzenketa aurkeztu ditu Iridoyk. Horietako nagusia, Plaiaundiko kirol instalazioak Txenpereneara eramateko proposamena da. Horretarako, 100.000 euro bideratzea eskatu dute. Beste proposamenen artean, Plaiaundi Institutuaren parean behin behineko aparkaleku bat egitea aurki daiteke. Gainera, indarkeria matxistarik gabeko hiria bihurtzeko arreta eta prebentzio politikak bultzatu nahi ditu EAJk. Amaitzeko, udalean egiten diren informazio batzordeak streaming bidez eskaintzea proposatu dute, eta hiriko kultur, kirol eta ekonomia elkarteei diru laguntzak ematea.
