Irungo EH Bilduk "arduraz" jokatuko du kreditu aldaketaren aurrean
Orotara, koalizio subiranistak 10 zuzenketa aurkeztu berri ditu, 167.000 euroko kopuruarekin.
Unanue, Melida eta Briones, gaurko agerraldian. Irungo EH Bildu taldeak kreditu aldaketaren inguruan egindako irakurketa elkarbanatu berri du gaur egindako agerraldian. Jokin Melida, Ane Unanue eta Oihana Briones zinegotzien arabera, “ez da ohikoa mota honetako kreditu aldaketa bat orain eta modu horretan ekartzea”. Urtea amaitzeko soilik hiru hilabete falta direla gogoratu dute, eta oraindik ere 8 milioi euro zertan inbertituko diren ez onartzea “anormaltasun” egoera dela salatu dute.
Egoera honen zergatia 2018ko aurrekontuen luzapenean dagoela zehaztu du Melidak. “Orduko gobernuak, euren gutxiengoaren kontziente izanda, erabaki zuen hobe zela hauteskunde urtean udalbatzan porrotik ez jasoteza, herrian inbertitzeko aurrekontu handiago bat edukitzea baino”. Laster abiatuko diren aurrekontuen negoziaketek “berebiziko garrantzia” izango dute koalizio subiranistako kideentzat. “Bertan EH Bilduk indar eta ahalegin guztiak jarriko ditu”.
“Herritarren ongizatean eragingo duten proiektu sendo eta anbiziokoak aurrera eramateko oso margen txikia” dagoela dio Melidak, egun planteatzen diren proiektuak abenduaren hasierarako bideratuta beharko luketelako. Egoera horren aurrean taldeak “arduraz” jokatuko duela zehaztu dute gaurko agerraldian.
Horretarako, zenbait zuzenketa aurkeztu berri ditu taldeak. Orotara, 10 zuzenketa aurkeztu dituzte, 167.000 euroko kopuruarekin. Honakoak dira zuzenketa horiek:
- Merkataritza txikia laguntzea teknologia berrien inguruko proiektua gauza dezan (60.000 euro).
- Gazteen eta langabeen kontrataziorako bideraturiko diru laguntzak ezagutzera emateko saioak egiteko (2.000 euro).
- Hutsik dauden etxebizitzen ezaugarriak jasotzen dituen errolda osatu bat egitea (20.000 euro).
- Energia berdearen zerbitzua martxan jartzeko azterketa egitea.
- Batez ere euskaraz egiten den eskaintza kultura handitzeko (5.000 euro).
- Oiassoko termen proiektua eguneratzeko (5.000 euro).
- Adinekoen zentroetan ekintzak egiteko (15.000 euro).
- Auzo elkarteetan materiala erosteko (20.000 euro).
- Bizikletak eta patineteak espaloitik ibili ez daitezen kontzientziazio kanpaina egitea (10.000 euro).
- Irungo Udalean etenaldiekin gauzatzen ari den memoria historikoaren proiektua behingoz eta era duinean gauza dadin (20.000 euro).
Amaitzeko, Ogasun saileko ordezkariarekin hainbat bilera egin dituztela aitortu du Melidak, eta “etorkizunera begirako hainbat konpromiso” lortu dituztela. Konpromiso hauek, baratze ekologikoaren proiektuen bigarren fasearen eta euskarazko komunikabideen sustapenaren ingurukoak dira.
