Urriaren 12an zabalduko ditu ateak Labore Txingudiren denda berriak
Abalistak eta lokal berria lortuta, 200 bazkideren langa gainditzea izango da kooperatibako kideen hurrengo helburua.
Dagoeneko dena prest dute denda berria zabaltzeko. Labore Txingudik dena prest du denda fisiko berria zabaltzeko. Gaur bertan jakinarazi dute datorren urriaren 12an (larunbata da) zabalduko dutela, Pelegrin de Uranzu kalean zehazki. Azken hilabeteotan zehaztutako hiru helburuetatik jada bi bete dituztela zehaztu dute gaurko agerraldian eta hurrengo pausoa bazkide gehiago lortzea izango dela.
Azken hilabeteotan, Labore Txingudiko kideak birfundazio prozesu batean murgilduta ibili dira. Izan ere, hiru erronka nagusi ezarri dituzte aurtengo ikasturterako: 15 abalista lortzea birfundazioa finantzatzeko, Lakaxita gaztexean zegoen denda kale mailako batean bilakatzea, eta egungo bazkide kopurua handitzea, 200ko langa gainditzeko asmoz. Bada, gaur jakinarazi dutenez, dagoeneko horietako bi helburu bete dituzte.
Abalistak lortuta, dena prest dute denda berria zabaltzeko. “Egia da prozesu zaila izan dela abalistak lortzea eta lokal berria aurkitzea, eta horregatik bazkidetza hein batean alde batera utzi dugu. Baina ordua iritsi zaigu bazkidetzarekin lanean hasteko”, adierazi dute gaurkoan. Hala, 200 bazkide lortzea izango da hurrengo helburu nagusia.
Inaugurazio berezi batekin zabalduko ditu ateak Labore Txingudiko denda berriak. Eskualdeko herritar eta eragile guztiei luzatu diete gonbita. Ordua jakin bezain laster, HITZAk horren berri emango du.
