Bizikletentzako doako puzgailuak jarri dituzte hiriko hiru gunetan
Bizikletaren gurpilak puzteaz gain, zulaketak konpontzeko eta presioa egokitzeko baliagarriak izango dira gailu berriak.
Borja Olazabal eta On Bizi markako banatzaile Nuria Veiga, gaurko aurkezpenean. Irungo Udalak jakinarazi berri duenez, dagoeneko hiriko zenbait puntutan bizikletak konpontzeko gailuak aurki daitezke. Herritarren eskuetara egongo dira, eta zerbitzua erabat doakoa izango da.
Bizikletaren gurpilak puzteaz gain, zulaketak konpontzeko eta presioa egokitzeko baliagarriak izango dira gailuak. Geltoki bakoitzak 10-18 kg-ko pisua du, eta QR kodeen bitartez, gailua ongi erabiltzeko ikastaro batetara bideratuko ditu irundarrak.
Orotara, hiriko hiru gunetan jarri dituzte: San Juan plazan (irudian), Arbesko Errota kalean (bidegorri hasieran) eta Azken Portu kiroldegi ondoko Juan Thalamas Labandibar kalean. Gainera, etorkizunari begira gehiago jartzeko asmoa du udalak.
Duela aste gutxi batzuk jarri arren, dagoeneko zenbait eraso jasan dituztela salatu nahi izan du kirol arloko ordezkari Borja Olazabalek. “Jarri bezain laster, zenbait erreminta desagertu egin ziren eta zutabera eusteko gailuak moztu egin zituzten. Horrelako ekintzek irundar guztiei egiten diete kalte”. Halere, dagoeneko gailu guztiak konpondu dituztela azaldu du.
