Irunabarrekin eta bertsolaritzarekin bat egiteko aukera asko
Irunabarrek prest du ikasturte berrirako eskaintza. Bost taldetan eman dezakete izena bertsotan hasi, jarraitu, edo trebatu nahi dutenek.
Ikasturtean zehar ere, hilean behin Bertso Gaua izaten da Kabigorrin. Argazkia: Irunabar. Irunabar Irungo Bertsoaren Bilguneak hasi du ikasturte berriko martxa. Horri lotuta, prest dituzten taldeen eskaintzaren berri eman diete bertsozaleei, edo bertsoen unibertsoarekin bat egin nahi dutenei. Zabala da eskaintza, adin tarteetan anitza, moldeetan erakargarria, “ez dadila inor bertsotarako gogoz geratu”, adierazi dute Irunabarreko kideek.
Bost talde eskaintza atera ditu plazara Irunabarrek. Beheko zerrendan daude. Ondorenean azaldutakoaz gain, interesdunek zalantzarik edo xehetasun gehiagoren nahirik badute, Irunabarren posta elektronikora idatz dezakete, edo taldeen arduradunekin zuzenena hitz egin telefono dei bidez (zerrendan daude taldeetako arduradunen telefono zenbakiak).
Honakoa da eskaintza:
- Gaztetxoen Taldea: astelehenero bilduko dira, 17:00etatik 18:00etara, Bidasoko AEK Irungo Euskaltegian. Harremanetarako: (0034) 669 366 589 (Egoitz).
- Bat-batean I Taldea: astelehenero bilduko dira, 19:00etatik 21:00etara (bilgunea zehaztu gabe dago oraindik). Harremanetarako: (0034) 669 366 589 (Egoitz).
- Bat-batekorako Hastapenak Taldea: asteazkenero bilduko dira, 19:00etatik 21:00etara (bilgunea zehaztu gabe dago oraindik). Harremanetarako: (0034) 669 366 589 (Egoitz).
- Bat-batean II Taldea: ostegunero bilduko dira, 19:30etik 21:30era, Hondarribiko Jaizubia auzoko auzo elkartean. Harremanetarako: (0034) 690 065 826 (Abel).
- Bertso Tailerra: hamabostean behin bilduko dira, 19:00etatik 20:30era, Bidasoko AEK Irungo Euskaltegian. Harremanetarako: (0034) 685 727 539 (Aitor) eta (0034) 638 326 970 (Adrian).
