Ikastetxeen inguruak hobetzeko proiektu pilotua martxan jarriko du udalak
Haur eta lehen hezkuntzako Ama Guadalupekoa ikastetxeari egokitu zaio esperientzia pilotua; ingurua hobetzea eta atseginagoa izatea dira helburu nagusiak.
Ikastetxeen inguruak hobetzeko helburua finkatu du Hondarribiko Udalak Hiriko Mugikortasun Jasangarrirako Planaren (HMJP) barruan. Inguru hauek «biziagoak» eta «atseginagoak» izatea du xede proiektuak, «bereziki, hezkuntza komunitatearen eta bizilagunen beharretan pentsatuta».
Hala, lehenengo proiektu pilotua haur eta lehen hezkuntzako Ama Guadalupekoa ikastetxearen inguruetan martxan jarriko du udal gobernuak. «Proposamenak irisgarritasun, segurtasun eta erakargarritasun arazoak konponduko ditu», azaldu dute, «pintura eta hiri altzarietan oinarritutako esku-hartzeen bidez, bertan egoteko, jolasteko, edo oinez zein bizikletaz mugitzea errazteko».
Hilaren 21ean egingo du Hondarribiko Udalak proiektuaren aurkezpena, 11:00etan, Bitoriano Juaristi kalean, ikastetxeko sarreran. Topaketa izatea nahi du udalak eta iritziak eta iradokizunak eman ahal izango dira.
