[GALERIA] Hondarribiko LGTBI Eguna
Bigarrenez, LGTBI Eguna egin zuten ostiral arratsaldean Hondarribian. Iaz bezala, Fenomena Kultur Elkarteak antolatu zuen, udalaren eta Ttopara kafetegiaren laguntzarekin. Arma Plaza izan zen festaren gunea. Bertan kokatu zuten SantaMariaMadalena arte tailerrak sorturiko oholtza ikusgarria.
Motores DJarekin hasi zen jardunaldia. Ondoren aldarrikapenerako unea iritsi zen. Madrilen bizi den Jose Cortes Amunarriz zinegile hondarribiarrak irakurri zuen pregoia, eta gay izateagatik gaixo edo delitugiletzat jotzen zuteneko garaiak izan zituen gogoan. Gay, lesbianen eta transexualen eskubideetan asko aurreratu dela onartu zuen Cortes Amunarrizek, baina oraindik bide luzea geratzen dela nabarmendu zuen.
Dudarik gabe, Paco Clavel artista andaluziarra izan zen Hondarribiko LGTBI Eguneko protagonista. Denetarik egin zuen, pintxatu, abestu eta behin eta berriro argazkietarako jarri.
