[Bideoa eta galeria] Gogotik ari dira ospatzen Irungo Errugbi Eguna
Irungo Errugbi Eguna ospatzen ari dira gaur Txingudi Errugbi Taldearen 50. urteurrena ospatzeko.
Irungo Errugbi Egunaren barruan kalejira egin dute Moskura Plaiaunditik abiatuta. Txingudi Errugbi Taldeak 50 urte beteko ditu aurten eta urteurrena behar bezala ospatzeko egitarau zabala prestatu dute. Kaleak hartu eta egun osoko egitaraua antolatu dute gaurko. Helburua, urteurrena ospatzea gogotik gainera eta errugbia zabaltzea. Irungo Errugbi Eguna ospatzen ari dira gaur. Adin tarte guztietako irundarrek aukera izan dute ekitaldi eta ekintza guztietan parte hartzeko.
10-12 urte azpikoen jardunaldiak izan dira goizean eta bazkalostean, berriz, kalejiran abiatu dira Moskura. Txaranga eta gaita jotzailea aurrean, errugbi baloiak lehen lerroan jarrita egin dute bidea dantzan txikiek, gazteek eta helduek. Guztiak taldearen elastiko laranja soinean. Errugbi jaia dute 18:00etatik aurrera Moskun eta puzgarriak, txosnak eta dendak daude bertan. 19:00etan The Induction taldeak emanaldia eskainiko du eta ordubete beranduago Patxiku Niceren txanda helduko da. Koipunk igoko da oholtzara 22:00etan eta ordubete beranduago berriz, DJek hartuko dute lekukoa.
