Gaztetxeak 'selektia' gainditzen lagunduko dizu
Ikasketak indartzeko saioak antolatu dituzte, irakasleen parte hartzearekin.
Zer moduz daramazu selektia? Ba al da ondo barneratzen ez duzun ikasgairik? Laguntzarik behar al duzu? Ba ez bitan pentsatu eta hurbildu zaitez Hondarribiko Gaztetxera. Selektia gainditzen lagunduko dizute.
Selektibitate proba prestatzeko saioak antolatu dituzte Hondarribiko gaztetxean. Elkarrekin ikasi eta zalantzak argitzeko saioak izango dira eta, saioren batean, irakasleak egongo dira. Atzoko saioan, adibidez, Historia irakasgaiko irakasle batek gidatu zuen saioa.
Historia landu zuten atzo, astelehenez, eta bihar ere elkartuko dira Historia errepasatzeko. Gaur, aldiz, letretako Matematikak landuko dituzte, 18:00etatik aurrera. Ostegunean, Filosofia eta zientzietako Matematikak 17:00etan, eta Gaztelania 19:00etan.
Ekainaren 8a, ospakizuna
Ekainaren 8an ospatuko dute ikasle hondarribiarrek selektibitatea amaitu eta gainditu dutela. Selekti osteko parranda eguna izendatu dute ekainaren 8a. Oraindik ez dute aurreratu egun horretan zer egingo duten, ikasten oso kontzentratuta omen daude-eta.
