EH Bildu: "Irunek eraldaketa behar du, bide horretan gure ahalegin guztiak jarriko ditugu"
Pertsonak erdigunean jartzeko eta auzoei ahotsa eta erabakitzeko ahalmena emateko ideiarekin bat egiten duten alderdiekin hitz egiteko prest azaldu da koalizio subiranista.
Jokin Melida, Irungo EH Bilduko bozeramailea. Irungo EH Bilduk joan den igandean babesa eman zioten herritarrak eskertu nahi izan ditu. Zinegotzietan kopuru berbera lortu arren, ia 500 boto berri lortu zituztela nabarmendu dute taldetik, eta azken unera arte laugarren zinegotzia lehian izan zutela. Orotara, 3.939 boto jaso zituen joan den igandeko udal hauteskundeetan.
“Zalantzarik gabe emaitza positiboa da, eta aurrera egiteko hauspoa da. Guk beti esan dugu Irunek eraldaketa behar duela, eta bide horretan, gure ahalegin guztiak jarriko ditugu”, diote koalizio subiranistatik. Irun berria beharrezkoa dela diote, eta hori gobernatzeko eredua aldatuz egiten dela, pertsonak erdigunean jarriz eta auzoei ahotsa eta erabakitzeko ahalmena emanez.
Hemendik aurrera koalizioaren ideia horiekin bat datozen guztiekin hitz egiteko prest daudela adierazi dute, “ezberdinen arteko elkarlanean sinesten dugulako, eta Irunek aldaketa bat merezi duelako”.
